ພິທີສະເຫຼີ...

ວັນທີ 25 ຕຸລາ 2024 ທີ່ຜ່ານມາ, ສທຄ ໄດ້ຈັດພິທີສະເຫຼີມສະຫຼອງວັນຄູແຫ່ງຊາດ 07 ຕຸລາ ຄົບຮອບ 30 ປີ, ປິດ-ເປີດສົກຮຽນ 2024-2025 ແລະ ມອບ-ຮັບປະກາສະນີຍະບັດ, ເປັນກຽດເຂົ້າຮ່ວມ ແລະ ມອບປະກາສະນີຍະບັດ ໃຫ້ກັບນັກສຶກສາປີສຸດທ້າຍ ເຊິ່ງແມ່ນ ທ່ານ ສຸລິສັກ ທຳນຸວົງ ຮອງຜູ້ວ່າການທະນາຄານແຫ່ງ ສປປ ລາວ.

ເພື່ອເປັນການສ້າງຄວາມເຂັ້ມແຂງໃຫ້ກັບຄູ-ອາຈານ ສທຄ ໄດ້ເຊື່ອມຊຶມ, ເຂົ້າໃຈເລິກເຊິ່ງກ່ຽວກັບວຽກງານການຮຽນ-ການສອນໃນໄລຍະໃໝ່ຫລາຍຂຶ້ນ, ໃນພິທີດັ່ງກ່າວ ສທຄ ໄດ້ຮັບກຽດຂຶ້ນປາຖະກະຖາ ໃນຫົວຂໍ້: "ບົດບາດຂອງຄູກັບສິ່ງທ້າທາຍຂອງການສຶກສາໃນຍຸກປັດຈຸບັນ" ໂດຍ ທ່ານ ຮສ. ປອ ຫລ້າວັນ ວົງຄໍາສານ ຫົວໜ້າກົມການສຶກສາຊັ້ນສູງ ກະຊວງສຶກສາທິການ ແລະ ກິລາ ອີກດ້ວຍ.

ທ່ານ ປອ. ສົມປະສົງ ພົມມະສານ ຮອງຜູ້ອຳນວຍການ ໄດ້ຂຶ້ນຜ່ານບົດສະຫລຸບຕີລາຄາການເຄື່ອນໄຫວວຽກງານການຮຽນ-ການສອນ ປະຈຳສົກສຶກສາ 2023-2024 ແລະ ທິດທາງແຜນການເຄື່ອນ ໄຫວ ປະຈຳສົກສຶກສາ 2024-2025 ເຊິ່ງໄດ້ສະແດງໃຫ້ເຫັນຜົນງານພົ້ນເດັ່ນ ແລະ ຈຸດອ່ອນຂໍ້ຄົງຄ້າງບາງດ້ານທີ່ສຳຄັນປະຈຳສົກສຶກສາ 2023-2024 ໂດຍສະເພາະການຜັນຂະຫຍາຍ, ຈັດຕັ້ງປະຕິບັດການຮຽນ-ການສອນ ຕາມຂໍ້ຕົກລົງວ່າດ້ວຍການຮັບຮອງ ແລະ ອະນຸມັດນຳໃຊ້ຫລັກສູດຈາກະຊວງສຶກສາທິການ ແລະ ກິລາຄື: ຫລັກສູດປະລິນຍາຕີການເງິນ-ການທະນາຄານ 05 ສາຂາຄື: ການທະນາຄານ, ການເງິນ, ການບັນຊີ, ການເງິນຈຸລະພາກ, ການບັນຊີ ແລະ ກວດສອບ, ຫລັກສູດຕໍ່ເນື່ອງປະລິນຍາຕີ ແລະ ຫຼັກສູດປະລິນຍາໂທ ສາຂາການເງິນ-ການທະນາຄານ ທັງພາກທິດສະດີ ແລະ ພາກປະຕິບັດຕົວຈິງ ເພື່ອຖ່າຍຖອດຄວາມຮູ້-ປະສົບການ ແລະ ທັກສະຕ່າງໆ ໃຫ້ແກ່ນັກສຶກສາ, ການທົດລອງນຳໃຊ້ເຕັກໂນໂລຊີເປັນເຄື່ອງມືຊ່ວຍຈັດການສອບເສັງເປັນຕົ້ນແມ່ນໂປຼແກຣມ Smart BI, Google Form ຜ່ານ Smartphone ຂອງນັກສຶກສາ ແລະ ຜ່ານຄອມພິວເຕີຕັ້ງໂຕະ ເປັນຕົ້ນ. ນອກນັ້ນ, ສທຄ ໄດ້ຮັບການອະນຸມັດເປີດຫລັກສູດ ລະດັບປະລິນຍາໂທ 02 ສາຂາຄື: ສາຂາການເງິນ ແລະ ສາຂາການທະນາຄານ ຈາກກະຊວງສຶກສາທິການ ແລະ ກິລາ ຢ່າງເປັນທາງການ ເພື່ອບໍລິການວິຊາການໃຫ້ກັບນັກຄົ້ນຄວ້າ ແລະ ສັງຄົມ ພ້ອມທັງສືບຕໍ່ເອົາໃຈໃສ່ແກ້ໄຂຈຸດອ່ອນຂໍ້ຄົງຄ້າງຕ່າງໆທີ່ມີໃຫ້ໝົດໄປ.

ໃນສົກສຶກສາ 2023-2024 ນັກສຶກສາທີ່ຄົບເງື່ອນໄຂສໍາເລັດການສຶກສາ ຈໍານວນ 796 ຄົນ, ຍິງ 576 ຄົນ. ໃນນັ້ນ, ມີນັກສຶກສາທີ່ມີຜົນງານ-ການຮຽນດີເດັ່ນຄື: (1) ໄດ້ຮັບກຽດນິຍົມ ຈໍານວນ 01 ຄົນ, ຍິງ 0 ຄົນ; (2) ນັກສຶກສາປະລິນຍາໂທ ຮຸ່ນທີ 1 ທີ່ປະກອບສ່ວນເຄື່ອນໄຫວ ແລະ ສຶກສາດີເດັ່ນ ຕະຫລອດຊຸດຮຽນ ປີ 2022-2024 ຈໍານວນ 03 ຄົນ ແລະ (3) ນັກສຶກສາລະດັບປະລິນຍາຕີ (ປີ 1-3) ທີ່ໄດ້ຮັບທຶນການສຶກສາຮຽນດີ-ຮຽນເກັ່ງ ຈໍານວນ 07 ຄົນ ແລະ (4) ນັກສຶກສາທີ່ມີຜົນງານປະກອບສ່ວນເຄື່ອນໄຫວໃນຂະບວນການກິດຈະກໍາຕ່າງໆ ຊ່ວຍ ສທຄ ຕະຫຼອດຊຸດຮຽນ 147 ຄົນ ແລະ ຍິງ 105 ຄົນ ໄດ້ຮັບການຍ້ອງຍໍ-ຊົມເຊີຍ.

ເພື່ອໃຫ້ພິທີມີຄວາມໝາຍຄວາມສຳຄັນຍິ່ງຂຶ້ນ ທ່ານ ສຸລິສັກ ທຳນຸວົງ ຮອງຜູ້ວ່າການທະນາຄານແຫ່ງ ສປປ ລາວ ຍັງໄດ້ໃຫ້ການໂອ້ລົມຕໍ່ພິທີ ເຊິ່ງທ່ານໄດ້ເນັ້ນໜັກຕໍ່ຄະນະນຳ, ພະນັກງານ, ຄູ-ອາຈານ ສທຄ ໂດຍສະເພາະ ໃນອະນາຄົດຕໍ່ໜ້າ ບັນດາສິ່ງທ້າທາຍ ແລະ ອຸປະສັກຫຼາຍຢ່າງ ຍັງສືບຕໍ່ທົດສອບພວກເຮົາໃນການສ້າງສາພັດທະນາຊັບພະຍາກອນມະນຸດ. ສະນັ້ນ, ເພື່ອຮັບປະກັນໃຫ້ການຮຽນ-ການສອນ ດຳເນີນໄປຢ່າງມີຄຸນນະພາບ ແລະ ປະສິດທິຜົນນັ້ນ ພວກເຮົາຈະຕ້ອງໄດ້ສືບຕໍ່ລົງເລິກໃສ່ວຽກຈຸດສຸມ ເປັນຕົ້ນແມ່ນ ເພີ່ມທະວີເອົາໃຈໃສ່ຕໍ່ການສຶກສາອົບຮົມການເມືອງແນວຄິດໃຫ້ແກ່ພະນັກງານ, ຄູ-ອາຈານ ແລະ ນັກສຶກສາ ໃຫ້ກໍາແໜ້ນເຊື່ອມຊຶມຕໍ່ແນວທາງນະໂຍບາຍຂອງພັກ-ລັດຖະບານ, ລະບຽບກົດໝາຍ, ວາລະແຫ່ງຊາດ, ໝູນໃຊ້ແນວທາງເສດຖະກິດເອກະລາດເປັນເຈົ້າຕົນເອງ (ສອຈ) ເຂົ້າໃນບັນດາແຜນງານໂຄງການ ແລະ ເອກະສານສຳຄັນອື່ນໆຕື່ມອີກ, ມີຄວາມສາມັກຄີ, ມີຈັນຍາບັນຈັນຍາທຳ, ເພີ່ມອັດຕາການເຂົ້າຮຽນໃນແຕ່ລະສາຂາໃຫ້ໄດ້ຕາມແຜນ, ແກ້ໄຂການປະລະການຮຽນ, ການສ້າງ ແລະ ຈັດຝຶກອົບຮົມ ແລະ ພັດທະນາຫລັກສູດໃນແຕ່ລະດັບ ຄຽງຄູ່ກັບການປັບປຸງແບບແຜນຍຸດທະສາດ, ສະດຸ້ງໄວ ແລະ ປັບຕົວຮອບດ້ານໃຫ້ທັນຕໍ່ສະພາບການປ່ຽນແປງໃໝ່, ປັບປຸງລະບຽບການ ແລະ ນໍາໃຊ້ເຕັກໂນໂລຊີ ຮັບປະກັນໃຫ້ແກ່ການ “ສ້າງຄົນ” ຖືເອົາ “ນັກຮຽນ-ນັກສຶກສາ ເປັນໃຈກາງໃນການພັດທະນາ ແລະ ຄູແມ່ນແບບຢ່າງກໍາລັງແຮງຫຼັກໃນການຂັບເຄື່ອນພັດທະນາ.

ຕໍ່ການໂອ້ລົມທີ່ມີຄວາມໝາຍຄວາມສຳຄັນດັ່ງກ່າວນັ້ນ ທ່ານ ປອ. ນາງ ທອນມີ ແກ້ວກິນນາລີ ຜູ້ອຳນວຍການສະຖາບັນການທະນາຄານ ໄດ້ຂຶ້ນຮັບຄຳໂອວາດ ຈາກທ່ານຮອງຜູ້ວ່າການທະນາຄານແຫ່ງ ສປປລາວ ເຊິ່ງການໂອ້ລົມແນະນຳຂອງທ່ານ ລ້ວນແຕ່ເປັນການສ່ອງແສງເຖິງການຕີລາຄາຄືນ ສະພາບການເຄື່ອນໄຫວໜ້າທີ່ການເມືອງ ກໍ່ຄືການຮຽນ-ການສອນ ຂອງຄູ-ອາຈານ ແລະ ນັກສຶກສາ, ການດຳເນີນວຽກງານໂຄງການຍຸດທະສາດໃນຕໍ່ໜ້າ ໂດຍສະເພາະໃນສົກສຶກສາ 2024 – 2025. ເຊິ່ງຄໍາເຫັນໂອ້ລົມແນະນໍາຂອງທ່ານ ໄດ້ເປັນແນວທາງ, ນະໂຍບາຍໃໝ່ ທີ່ມີຄວາມສຳຄັນ ຕໍ່ການຈັດຕັ້ງເຄື່ອນໄຫວວຽກງານຕົວຈິງຂອງ ສທຄ ຂອງພວກເຮົາ.

ໂດຍ: ອາຈານ ສີລິມຸງຄຸນ ຫລວງລາດ